للمتابعه على الفيس بوك
https://www.facebook.com/groups/wazayef.masr/
https://www.facebook.com/onlinerecruiter
قبل ما تشتغل لازم تمر بمقابلة العمل اللي من خلالها الموظف المسؤول في الشركة بيقرر هيختار مين …دراستك ومهاراتك وخبراتك ممكن تكون ممتازة لكن طريقة اجابتك على اسئلة المقابلة والانطباع اللي هيتاخد عنك حاجات أساسية عشان تتقبل في أي وظيفة.
في مقابلة العمل بيبقى فيه أسئلة صعبة ممكن تحتار تجاوبها ازاي وده غالبا لان الهدف منها بيبقى مش واضح بالنسبة ليك…لكن لو هنبصلها من وجهة نظر تانية، الموظف اللي بيعمل المقابلة بياخد وقت كبير جدا عشان يقابل المتقدمين لوظيفة معينة، والاسئلة الصعبة دي الهدف منها انها تختصر وقت المقابلة لأنها بتبين نقاط الضعف بشكل أكبر.
عشان كده لازم تكون جاهز لأي سؤال وعارف أفضل طريقة للرد عليه..ومن أصعب الأسئلة اللي ممكن تتسألها في مقابلة العمل:
1- قدم نفسك/ اتكلم عن نفسك.
السؤال ده على الرغم من بساطته كتير من الناس لما بتيجي تجاوب عليه بيسمّعوا السيرة الذاتية بتاعتهم وساعات بيقولوا معلومات شخصية متهمش اللي بيسأل..عشان تجاوب اجابة مناسبة على السؤال ده وتدي انطباع كويس عنك خصوصا انه بيكون أول سؤال، اتكلم عن 3 حاجات اساسية: دراستك، والشغل اللي اشتغلته قبل كده والخبرات اللي اكتسبتها منه، وخلي اجابتك في حدود دقيقة أو دقيقتين كحد أقصى.
في حالة انك بقالك فترة طويلة مبتشتغلش:
2- ليه قعدت طول الفترة دي مبتشتغلش؟
عشان تجاوب على السؤال ده ممكن تقول الحاجات اللي كنت بتعملها في الفترة دي، ممكن تتكلم عن أي عمل حر اشتغلته، أو عمل تطوعي أو حتى لو كنتي أم وخدتي أجازة عشان ولادك، أهم حاجة يبان أن الوقت ده تم استغلاله بشكل كويس.
في حالة انك بتشتغل حاليا:
3- ازاي عرفت تيجي المقابلة في وقت الشغل؟
الهدف من السؤال ده انه يعرف هل انت مثلا بتكذب على مديرك عشان تيجي المقابلة لأنك لو بتعمل كده فعلا يبقى هتكذب على مديرك الجديد كمان ….لما تجاوب على السؤال ده ممكن تقول انك واخد اليوم ده أجازة من اجازاتك، وانك بتاخد من وقتك الشخصي عشان تروح مقابلات الوظايف اللي تهمك.
4- ازاي جهزت نفسك للمقابلة؟
الهدف من السؤال ده انه يعرف انت أد ايه مهتم بالوظيفة، يعني محضّر فعلا ولا بتروح أي مقابلة لأي وظيفة وخلاص، عشان تجاوب السؤال ده بشكل مناسب لازم تقول انك مهتم جدا بالوظيفة دي وانك قبل ما تيجي اهتميت انك تعرف معلومات عن الشركة من خلال الموقع الالكتروني للشركة…ممكن كمان تسأل اسئلة تدل انك قريت عن الشركة والوظيفة فعلا…ممكن تسأل عن اختصاصات قسم من أقسام الشركة مثلا.
5- ليه المفروض أختارك للوظيفة دي؟
ده من أكتر الأسئلة اللي كتير من الناس مبتعرفش تجاوب عليها وده غالبا لانهم مش بيعملوا بحث كويس قبل المقابلة، اجابتك على السؤال ده المفروض توضح ليه انت أكتر واحد مناسب ومؤهل للوظيفة دي، إقرا كويس عن الوظيفة اللي انت مقدملها والمهام اللي هتبقى مسؤول عنها عشان تعرف المهارات الاساسية اللي الوظيفة بتحتاجها واللي هتبني عليها اجابتك بطريقة توضح ان عندك المهارات دي، ويا ريت لو تتكلم عن خبراتك في نفس المجال.
6- ايه اكتر حاجة بتضايقك في زمايلك في الشغل أو مديرينك؟
المفروض تظهر في المقابلة كشخص متفائل ومهتم بالشغل ومش بتحب المشاكل، السؤال ده معمول عشان يعرفوا هل هتعمل مشاكل بعد كده مع مديرينك أو زمايلك…يا ريت متفتكرش مواقف ضايقتك من زمايلك ومديرينك قبل كده ..ميبقاش قلبك اسود…ممكن تفكر ثواني كده وتقول انك مش فاكر أي حاجة معينة ضايقتك…يا ريت كمان لو تمدح في مديرك السابق وتقول انه كان عادل واتعلمت منه كتير، وان زمايلك كانوا متعاونين لان ده هيبين انك بتبص للأمور بإيجابية ودي مميزات هتعجب اللي بيعمل المقابلة.
7- ممكن توصفلي موقف قدرت فيه تحل مشكلة في الشغل أو الكلية؟
السؤال ده مش المفروض يفاجئك لأنه متوقع جدا، وبالرغم من كده كتير من الناس بتفوّت الفرصة دي عشان يبيّنوا مهاراتهم..جهز اجابة للسؤال ده، اتكلم مثلا عن موقف قدرت فيه تنظم الوقت بشكل كويس وقدرت فيه تنجز شغل كتير في وقت قياسي..أو أي موقف تاني يبيّن مهاراتك.
8- ممكن توصفلي موقف في الشغل أو المدرسة اتعاملت معاه بشكل خاطيء؟
خد بالك أوي وانت بتجاوب السؤال ده، اللي بيسألك عايز يفهم هل بتتعلم من أخطائك ولا بتكرر نفس الغلط كل شوية أو ممكن كمان يبقى عايز يعرف بتعترف باخطائك ولا لأ…مش مطلوب منك انك تقول قائمة باخطائك وعيوبك لأن ده ممكن يلفت نظره لعيوبك ويقلل من فرصك في انك تتقبل في الوظيفة.. ممكن تقول خطأ بسيط عملته بحسن نية ولازم تقول بعدها الدرس اللي اتعلمته من الخطأ ده واللي خلاك متكرروش تاني.
9- نفسك تشتغل فين؟
الهدف من السؤال انه يتأكد انك مهتم فعلا بالوظيفة، ويُفضل انك متقولش اسم شركة تانية أو وظيفة تانية، الهدف من المقابلة انك تبين اسباب كونك الشخص المناسب للوظيفة اللي انت مقدملها، الاجابة المناسبة على السؤال ده ممكن تكون باختصار: “انا مهتم بالوظيفة دي وده المكان اللي نفسي اشتغل فيه”.
10- لو كسبت الياناصيب وبقيت مليونير، هتكمل شغل؟
صحيح ان السؤال شكله ساذج، بس هو يبين الدوافع اللي بتخليك تشتغل وبيدي فكرة عن اخلاقيات العمل عندك، ممكن تقول انك أكيد هتبقى سعيد لو بقيت مليونير، لكن كمان لازم ساعتها تشتغل وتعمل حاجة مفيدة وليها قيمة لان الفلوس مش كل حاجة والشغل برضه بيخليك مبسوط.
لو اتسألت سؤال مش عارف اجابته متقلقش، ممكن تطلب وقت أكبر للتفكير في السؤال أو ممكن تطلب انك ترجع للسؤال ده في الاخر، او ببساطة تقول انك مش عارف الاجابة وانك
تفضل تبحث اكتر لانك مش حابب تخمن، ولو جاوبت كويس في باقي الاسئلة مش هتترفض لمجرد انك مجاوبتش على سؤال واحد.
http://www.forbes.com/sites/jennagoudreau/2012/02/23/watch-out-ten-interview-questions-designed-to-trick-you/
ليست هناك تعليقات:
إرسال تعليق